د مالیې وزارت سرپرست او د سویلي اسیا لپاره د نړیوال بانک مرستیال د خبرو اصلي محور د افغانستان له کورنیو سرچینو د انرژۍ تولید په برخه کې د خصوصي سکټور پانګونه وه
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وږې میاشتې په ۲۲ مه نېټه د امریکا متحده ایالتونو واشنګټن ډي سي ته د سفر په مهال د سویلي اسیا لپاره د نړیوال بانک له مرستیال ښاغلي هارتویګ شیفر، سره د اړینو زېربنایي پروژو په پلي کېدو، د افغانستان له کورنیو سرچینو د انرژۍ په تولید، سیمه ایزې نښلونې سره د نړیوال بانک په ملاتړ، د زېربنایي پروژو په پلي کولو کې د خصوصي سکټور په پانګونه او د افغانستان له کورنیو سرچینو د انرژۍ د تولید او یو شمېر نورو ورته مسایلو په تړاو خبرې وکړې او په دې برخو کې د نړیوال بانک د همکاریو او ملاتړ غوښتونکی شو.
د سویلي اسیا لپاره د نړیوال بانک مرستیال، افغانستان ته د یادو برخو د ملاتړ او همکاریو ډاډ ورکړ.
همدا شان دواړو لوریو پرېکړه وکړه، څو د اړینو زېربنایي پروژو په برخه کې د خصوصي سکټور د پانګونې په ځانګړې توګه د افغانستان له کورنیو سرچینو د انرژۍ تولید موضوع د نړیوال بانک او پیسو نړیوال صندوق په را روانو ناستو کې چې ټاکل شوې ده، راتلونکی اوکتوبر په واشنګټن ډي سي، کې تر سره شي، تر غور لاندې ونیول شي.
