د مالیې وزارت سرپرست د افغانستان لپاره د ایټالیا له نوي ټاکل شوي سفیر سره د پیژندنې ناسته وکړه
د مالیې وزارت نوماند وزیر او سرپرست ښاغلي عبدالهادي ارغندیوال نن د لړم میاشتې په ۶ مه نېټه د افغانستان لپاره د ایټالیا له نوي ټاکل شوي سفیر ښاغلي ویتوریو سندالي سره په مالیې وزارت کې د پیژندنې ناسته وکړه.
په دې ناسته کې چې د ایټالیا هیواد د پراختیایې ادارې رئیس ښاغلي جواني ګرندي، هم شتون درلود، په پیل کې د ایټالیا سفیر وویل چې هیواد یې د افغانستان له خلکو او حکومت سره ولاړ دی او یاد هیواد به خپلو مرستو ته دوام ورکړي. نوموړي زیاته کړه چې زه به د خپل ماموریت په دوره کې هڅه وکړم چې د دواړو هیوادونو تر منځ اړیکې لا پیاوړې کړم. د ایټالیا سفیر وویل چې د افغانستان په اړه د ۲۰۲۰ کال پراختیایې کنفرانس کې چمتو یو چې له افغانستان سره خپلې مالې ژمنې نوی کړو.
د ایټالیا د پراختیایې ادارې رئیس وویل زه به هم د افغانستان د مالیې وزارت د همکار په توګه له دې هیواد سره خپلو مرستو ته دوام ورکړم. نوموړي د افغانستان لپاره د ۲۰۲۰ کال پراختیایې کنفرانس مهم یاد کړ او ویې ویل چې ایټالیا هڅه کوي څو خپلې زیاتې مرستې د افغانستان د ملي بودیجې له لارې مصرف کړي. نوموړي زیاته کړه چې د ایټالیا لپاره د خصوصي سکټور وده، د کرنې سکټور، د ښځو پیاوړتیا او سېمه ایزه نښلونه زیات ارزښت لري.
د مالیې وزارت سرپرست نوموړي ته د ښه راغلاست ترڅنګ، په بېلابېلو برخو کې له افغانستان سره د ایټالیا هیواد له مرستو مننه وکړه او ویې ویل، چې د افغانستان حکومت په ځانګړي توګه د مالیې وزارت له ایټالیا سره د همکاریو د اوږدېدو غوښتونکی دی. هغه زیاته کړه، موږ هیله مند یو چې ستاسو له راتګ سره به د دواړو هیوادونو اړیکې لا له وړاندي پراخی شي. د مالیې وزارت سرپرست زیاته کړه، چې موږ هم د خصوصي سکټور او کرنې سکټور د پیاوړي کولو او ودې او همدا رنګه د سیمه ایز اتصال او له فساد سره د مبارزې په برخه کې خپل پروګرامونه لرو او زه د مالیې وزارت د تصدۍ مسؤل په توګه د مالیې وزارت په هیڅ اداره کې فساد د منلو وړ نه بولم او له فساد سره به زموږ مبارزه دوام ولري.
د مالیې وزارت سرپرست، د ملي بودیجې د سند له لارې د ایټالیا د مرستو تنظیم او د جینوا په کنفرانس کې د دې هیواد د مالي ژمنو نوي کول د افغانستان لپاره یو ښه خبر وباله او هرکلی یې وکړ.