د مالیې وزارت سرپرست د افغانستان لپاره د بریتانیا شاهي هیواد له نوې سفیرې سره د پیژندنې ناسته وکړه
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پرفیسور محمد همایون قیومي، نن د غبرګولي میاشتې په ۱۲ مه نېټه د افغانستان لپاره د بریتانیا شاهي هیواد له نوې ټاکل شوې سفیرې اغلی الیسن ماری بلیک سره د پیژندنې ناسته وکړه.
په دې لیدنه کې د مالیې وزارت سرپرست نومړې ته د ښه راغلاست او مبارکۍ تر څنګ له افغانستان سره د بریتانیا هیواد له مرستو څخه مننه وکړه.
همداشان دواړو لوریو د افغانستان او بریتانیا تر منځ د اقتصادي او سوداګرۍ اړیکو په زیاتوالي، د عوایدو او ګمرکونو په برخو کې د روڼتیا او اصلاحاتو په راوستلو او د کانونو په برخه کې د پانګونې په موخه د بریتانیا د لویو شرکتونو د پانګونې په جلبولو بحث او د نظرونو تبادله وکړه.
د مالیې وزارت سرپرست د اقتصادي ځان بسیاینې پالیسي او د مالي پانګونې بسته یې نومړې ته ورکړه او په بیلابیلو سکټورونو کې چې د دوی د خوښې وړ وي، د پانګونې غوښتونکی شو.
