د مالیې وزارت سرپرست د افغانستان لپاره د چین ولسي جمهوریت له نوي سفیر سره د پیژندنې ناسته وکړه
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د لیندۍ میاشتې په ۶ مه نېټه د افغانستان لپاره د چین ولسي جمهوریت له نوي سفیر ښاغلي وانګ یو، سره په مالیې وزارت کې وکتل.
په دې لیدنه کې د مالیې وزارت سرپرست نوموړي ته د ښه راغلاست تر څنګ، له افغانستان سره د چین له مرستو مننه وکړه او د داوړو هیوادونو ترمنځ یې د تاریخي اړیکو یادونه وکړه. د چین سفیر په افغانستان کې د خپل نوي ماموریت له پیلدو خوښي څرګنده کړه او هیله یې وښوده، چې د خپلې کارې مودې په دوره کې به د دواړو هیوادونو اقتصادي، سوداګریزې، کلتوري او ټولنیزې اړیکې پراخې او ژورې کړي.
همدا شان دواړو لوریو د رېل کرښې له لارې د دواړو هیوادونو د صادراتو او وارداتو په زیاتېدو، د بدخشان واخان له لارې د نوري فایبر په لېږدېدو او نښلېدو، د عینک مسو کان پروژې په ستونزو، د چین له لوري د پراختیایي پروژو د ملاتړ او د هغو د مالیاتي ستونزو هواري په تړاو بحث او خبرې وکړې. د مالیې وزارت سرپرست، تخنیکي ډلو ته لارښوونه وکړه، څو په لنډه موده کې نافذه قوانینو ته په کتو مالیاتي ستونزې حل او هوارې کړي.
د چین سفیر په کابل کې د تخنیکي او حرفوي روزنې ملي انسټیټیوټ جوړېدو او بشپړېدو یادونه وکړه و ویې ویل، چې هیواد یې چمتو دی دغه انسټیټیوټ ډېر ژر افغانستان ته وسپاري. د مالیې وزارت سرپرست وویل، چې د تخنیکي او مسلکي تعلیماتو له خپلواکې ادارې سره خبرې کوي، څو د دې مرکز تسلیمي د چین له هیواده د یوه لړ مراسمو په ترڅ کې واخلي.
