د مالیې وزارت سرپرست د ایران د نیرو (انرژۍ) وزیر سره د اړوندو اقتصادي موضوعاتو په اړه خبرې وکړې
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د زمري میاشتې په ۸ مه نېټه د ایران هیواد د نیرو (انرژۍ) له وزیر ښاغلي رضا اردکانیان سره چې د یو لوړ پوړي پلاوي په مشرۍ کابل ته راغلی، په ولسمشرۍ مانۍ کې وکتل.
په دې کتنه کې چې د مالیې وزارت د عوایدو او ګمرکونو معینیت سرپرست ښاغلي عبدالولید تمیم او د افغانستان لپاره د ایران سفیر ښاغلي محمد رضا بهرامي هم شتون درلود، دواړو لوریو د افغانستان او ایران تر منځ د اقتصادي او سوداګرۍ اړیکو په لا زیاتوالي، د دواړو هیوادونو تر منځ د انرژۍ په برخه کې په همکاریو، د افغانستان له لارې ایران ته د منځنۍ اسیا د برښنا په لیږدولو، د افغانستان له لارې منځنۍ اسیا ته د ایران د ګازو او نفتو په لیږدولو، د دواړو هیوادونو لپاره د انرژۍ صادراتو څخه په اقتصادي فرصتونو، جنس په جنس د سوداګریزو توکو په تبادلې، د ګمرکي اطلاعاتو د تبادلې په ګډون په ګمرکي همکاریو، د ریل پټلۍ په برخه کې په همکاریو، پولو کې د بازارچو په تنظیمولو، د کرنې په برخه کې د ګډو ظرفیتونو په بررسۍ، د ارین بانک د ستونزو په حل لارو، د افغانستان او ایران تر منځ د اقتصادي او سوداګرۍ ګډې کمېټې د جوړیدو لپاره په چمتو والي او یو شمېر نورو اړوندو مسایلو بحث او د نظرونو تبادله وکړه. .
د مالیې وزارت سرپرست د ایران انرژۍ وزیر ته ډاډ ورکړ چې د ارین بانک ستونزه به د افغانستان له مرکزي بانک سره تعقبوي او اړوندو قوانینو ته په کتو سره به ورته رسیدنه وشي.
د ایران انرژۍ وزیر د مالیې وزارت سرپرست ته بلنه ورکړه چې د اړوندو اقتصادي موضوعاتو د تعقیب او د چابهار بندر څخه د لیدنې په موخه په یو مناسب فرصت کې ایران ته سفر وکړي.
