د مرکز او ولایتي ګمرکونو کارکوونکو ته د (مسلکي کولو) تر سرلیک لاندي روزنیز پروګرام پای ته ورسېد!

د مالیې وزارت د عوایدو او ګمرکونو ملي اکاډمۍ د کلني تدریسي پلان له مخي، د ولایتي ګمرکونو د ټرانزیټ برخي (۲۶) تنو کارکوونکو ته د (مسلکي کولو) تر سرلیک لاندي د جوړ سوي روزنیز پروګرام ګډونوالو ته تصدق پاڼي ورکړل سوې.
په همدې تړاو جوړه سوې غونډه کي د مالیې وزارت د ګمرکونو لوی رئیس مولوي محمد حامد احمد، د کارکوونکو چارو ریاست د زده کړو او وړتیا لوړولو آمر محمد نادر همایون، د د عوت ارشاد ریاست امام مولوي وصیف احمد احمدي او د عوایدو او ګمرکونو د ملي اکاډمۍ آمر بلال احمد احدي  ګډون کړی وو.
د ګمرکونو لوي رئیس وویل، چي ټول مسئولین باید ولس ته پر وخت خدمتونه وړاندي کړي، ملي عواید په پوره دقت او روڼتیا سره راټول کړي، ولس او همدارنګه ملي سوداګرو ته په اړوندو برخو کي لازمي اسانتیاوي برابري کړي.
د غونډي نورو ویناوالو هم د کارکوونکو د وړتیا لوړولو په برخه کي د ورته روزنیزو پروګرامونو جوړول ګټور وبلل او له کارکوونکو څخه ئې وغوښتل، چي له داسي فرصتونو څخه په ګټي اخیستني سره سپارل سوي مسئولیتونه په مسلکي ډول پرمخ یوسي او خلکو ته د ريښتیني خدمت مصدر وګرځي.
د غونډي په پای کي ګډونوالو ته تصدیق پاڼي ورکړل سوې.
د یادوني وړ ده، چي په دغه (۲۶) ورځني پروګرام کي د ګمرکي قوانینو، د کورني او بهرني ټرانزیټ د کړنلارو، د نړیوال ټرانسپورټ د کړنلارو، د (WCO) او (WTO)  سازمانونو د پېژندني، د ګمرکي اموالو د کنټرول او تشرېح، د نړیوال خونديتوب پروګرام (PGS) او اسیکوډا سیسټم په تړاو هر اړخیز معلومات وړاندي سول.