له تروریزم سره اغېزمنه مبارزه، د تروریزم له مالي ملاتړ سره جدي مبارزې ته اړتیا لري
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د اسټرالیا هیواد په ملبورن ښار کې د تروریزم له مالي ملاتړ سره د مبارزې په ناسته کې ګډون وکړ.
د مالیې وزارت سرپرست، په دې ناسته کې د تروریزم له مالي ملاتړ سره د مبارزې په لاره کې د افغانستان د حکومت په دریځ او د افغانستان د اوسنیو اقداماتو په تړاو خبرې وکړې. هغه د ټولو هیوادونو له سرتېرو په ځانګړي توګه په افغانستان کې د استرالیا د سرتېرو له سرښندنو مننه وکړه او په نړۍ او افغانستان کې یې له تروریزم سره په ګډه جدي مبارزې ټینګار وکړ. ښاغلي قیومي زیاته کړه، چې په افغانستان کې له تروریزم سره جګړه زموږ او تاسو ګډ مسؤلیت دی او له تروریزم سره مبارزه جدي پاملرنې ته اړتیا لري.
د ناستې په اوږدو کې نوموړي، له تروریزم سره د مبارزې په برخه کې د افغانستان حکومت په ټولو اقداماتو خبرې وکړې او ډاډ یې ورکړ چې افغانستان د نړیوال تروریزم د اصلي قرباني په توګه د تروریزم په له منځه وړلو کې به له هیڅ ډول هلو ځلو څخه سپما ونکړي.
دغه ناسته چې هر کال له تروریزم سره د مبارزې په برخه کې په ژمنو هیوادونو کې جوړېږي، سږ کال د ۶۵ هیوادونو، ۲۰ وزیرانو، د ۱۴ نړیوالو سازمانونو د استازو د مالي او تخنیکي کمپنیو، لوړ پوړو چارواکو، د حکومتدارۍ، صنایع، سوداګرۍ او اکاډمیکو چارو کارپوهانو، په اسټرالیا هیواد کې تر سره شوه.
ټاکل شوې ده، راتلونکې ناسته د هند په کوربه توب په ۲۰۲۰ کال کې د دې هیواد په یوه ښار کې ترسره شي.
