له پاکستان سره د هیواد بندرونو بیا فعالولو لپاره د مالیې وزارت هڅې
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د کب میاشتې په ۲۹ مه نېټه چې د افغانستان د سوداګرۍ او پانګونې خونې مرستیال ښاغلي محمد یونس مومند او د افغانستان او پاکستان ګډې خونې اجرائیوي رئیس ښاغلي نقیب الله صافي؛ هم شتون درلود د کندهار ولایت خصوصي سکټور له استازو سره وکتل.
ښاغلي مومند، د هیواد د بندرونو پرانیستي پاتي کېدو په برخه کې د مالیې وزارت له سرپرست مننه وکړه او له هغه یې هیله وکړه، چې د افغانستان او پاکستان بندرونه دي د توکو د لېږد رالېږد پرمخ پرانیستي وي او د هیواد په ګمرکونو کې دي د خوراکي توکو ګدامونه جوړ شي.
د کندهار ولایت خصوصي سکټور استازو وړاندیز وکړ، چې د چابهار او عباس بندرونو له لارې د پیسو لېږدولو په موخه له ایراني لوري سره خبرې وشي.
د مالیې وزارت سرپرست؛ هغوی ته ډاډ ورکړ، چې حکومت هڅه کوي د خصوصي سکټور ستونزې حل کړي. نوموړي زیات کړه، چې د بندرونو بیا پرانیستو لپاره یې پرون د پاکستان له سفیر سره خبرې کړي دي او نن به د صنعت، سوداګرۍ او پانګونې په چارو کې د پاکستان لومړي وزیر له ستر سلاکار ښاغلي عبدالرزاق داؤد؛ سره هم خبرې وکړي.
