د مالیې وزارت سرپرست د اباد راهان پارس نړیوالې ډلې له رئیس سره په یو شمېر زېربنایي موضوعاتو خبرې وکړې
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وږې میاشتې په ۱۱ مه نېټه د اباد راهان پارس نړیوالې ډلې له رئیس ښاغلي فرزاد اناري او د هغه له یو شمېر همکارانو سره په مالیې وزارت کې وکتل.
په دې لیدنه کې چې په مشهد کې د افغانستان جنرال قنسول ښاغلي عبدالجبار انصار، هم شتون درلود، د اباد راهان پارس نړیوالې ډلې رئیس، د مالیې وزارت سرپرست ته په تېرو ۱۵ کلونو کې په افغانستان کې د نوموړې ډلې د زېربنایي کړنو، لکه د هرات – تورغونډۍ، اسلام کلا، هرات ښار هوایي ډګر، د میدان ښار- بامیان سړک او د هرات – خواف درېیمې ټوټې رېل کرښې پروژو په تړاو هر اړخیز معلومات ورکړل.
همدا شان دواړو لوریو، په افغانستان کې د ایراني سوداګرو په پانګونه، د ساتنې او پالنې واحد سیستم جوړولو لپاره د نوموړې ډلې په همکارۍ، د سړکونو رغولو او جوړولو په برخه کې د دې ډلې په لېوالتیا، بندونو او تونلونو، د هرات- تورغونډۍ پروژې له بشپړېدو وروسته د اباد راهان پارس نړیوالې ډلې د حساب په تصفیه کولو او یو شمېر نورو ورته مسایلو په تړاو خبرې وکړې.
