د مالیې وزارت سرپرست او د افغانستان لپاره د اروپایي ټولنې سفیر د خبرو اصلي محور سیمه ایزه نښلونه او د افغانستان او اروپایي تولنې دوه اړخیزه همکاري وه
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۳ مه نېټه د افغانستان لپاره د اروپایي ټولنې له سفیر ښاغلي پییرمیادون، سره په مالیې وزارت کې وکتل.
په دې کتنه کې د مالیې وزارت سرپرست، د رڼو ټاکنو ترسره کېدو لپاره د اروپایي ټولنې له ۸ میلیونه امریکایي ډالرو مرستې مننه وکړه او دواړو لورویو د بروکسل په ښار کې د سیمه ایزې نښلونې په کنفرانس، د سیمه ایز اتصال په برخه کې د اروپایي ټولنې په مرستو او رول، د افغانستان او د دې ټولنې ترمنځ د دولت جوړونې قرارداد د کار په پرمختګ، د کار د چټکتیا په موخه د ولسي تړون پروګرام د بررسي او نورو ورته مسایلو په تړاو خبرې او د نظرونو تبادله وکړه.
د اروپایي ټولنې سفیر وویل، چې د روان کال نوامبر په میاشت کې د اروپایي ټولنې پارلمان پرانیستل کېږي او نوي غړي به یې هم له افغانستان د مرستو د دوام غوښتونکي وي.
د مالیې وزارت سرپرست وویل، د افغانستان د ځان بسیاینې لپاره چې کوم پرګرامونه پلي کېدونکي دي، موږ غواړو چې د نړیوالې ټولنې یو ښه شریک و اوسو نه د یوه مرسته غوښتونکي هیواد په توګه. نوموړي زیاته کړه، چې د انرژۍ، سوداګرۍ او سیمه ایز اتصال په برخه کې د اروپایي ټولنې له مرستو د زړه له کومي مننه کوم.
