د مالیې وزارت سرپرست، جیبوټي هیواد کې د متوازنې او ټول شموله روزنې په درېیمه نړیواله ناسته کې ګډون وکړ
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د سلواغې میاشتې په ۷ مه نېټه په جیبوټي هیواد کې د متوازنې او ټول شموله روزنې په درېیمه نړیواله ناسته کې ګډون وکړ.
په دې ناسته کې چې د مختلفو هیوادونو لوړ پوړو چارواکو ګډون کړی وو، موخه یې د ملګرو ملتونو د پایداره موخو مطابق د غړو هیوادونو باکیفیته، ټول شموله، عادلانه او متوازنې روزنې ته لاسرسی دی.
په یاده ناسته کې د ټول شموله او برابرې روزنې، د ټولنیزې، بشري سرچینو پراختیا لپاره په پانګونه، په روزنیزو سیستمونو کې د مثبت بدلون راوستو او یو شمېر نورو اړوند مسایلو په تړاو خبري او فکري مبادله وشوه.
د یادونې وړده، چې د متوازنې او ټول شموله روزنې ناسته په جیبوټي کې د دریو ورځو لپاره ترسره کېږي او د ناستې په پایې کې به ګډونوال هیوادونه د متوازنې او ټول شموله روزنې نړیواله خبرپاڼه او مل پاڼه لاسلیک کړي. د اعلامیې له لاسلیک وروسته به ګډونوال هیوادونه د یوه کال په موده کې د خبرپاڼې مؤثریت و ارزوي او د ګټورتوب په صورت کې به د روزنې همکاریو سازمان (OEC) رسمي غړیتوب ومني.
