د مالیې وزارت سرپرست د جایکا او پیسو نړیوال صندوق په ګډ کنفرانس کې ګډون وکړ
ټول شموله او پایداره پراختیا ته د اسیایي هیوادونو لاسرسي په موخه د جاپان نړیوالو همکاریو ادارې (JICA) او پیسو نړیوال صندوق ګډ کنفرانس د جاپان په توکیو ښار کې جوړ شو.
په دې کنفرانس کې چې د اسیایي هیوادونو او پیسو نړیوال صندوق چارواکو او مسؤلینو ګډون درلود، د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د افغانستان په استازولۍ ګډون پکې کړی وو.
په یاد کنفرانس کې په بېلابیلو موضوعاتو لکه د مالي سرچینو ښه مدیریت له لارې پایداره ودې ته په پراخ لاسرسي، تر ۲۰۳۰ کال پوري د ملګرو ملتونو سازمان پایداره پراختیایي موخو ته د رسېدو لپاره په مسؤلیت او مالکیت، د پراختیا په حال کې هیوادونو لپاره په مرستو څو دغه هیوادونه وکولی شي خپل ملي در عواید زیات او غیر اړین لګښتونه کم کړي، د سویلي اسیا د ودې وړتیا پرانیستو لپاره د پراخو اصلاحاتو په پلي کولو، د خصوصي سکټور په پیاوړتیا او وده، د جنسیتي تبعیض په له منځه وړلو او یو شمېر نور اړوندو مسایلو په تړاو خبرې وشوې.
