د افغانستان برښنا شرکت مدیره پلاوي د دې شرکت مالي ستونزو په حلولو خبرې وکړې
د افغانستان برښنا شرکت مدیره پلاوي غونډه نن د وري میاشتې په ۲۸ مه نېټه د مالیې وزارت نوماند وزیر او سرپرست ښاغلي عبدالهادي ارغندیوال په مشرۍ په مالیې وزارت کې جوړه شوه.
په دې غونډه کې چې د افغانستان برښنا شرکت مدیره پلاوي شتون درلود، په پیل کې د تېرې غونډې صورت جلسه تائید شوه او د افغانستان برښنا شرکت اجرائیوي رئیس ښاغلي امان الله غالب په ۱۳۹۹ کال کې د دې شرکت په ستونزو او تدارکاتي پلان غونډې ته معلومات وړاندې کړل.
ښاغلي غالب وویل چې د کرونا ویرس خپریدل او د سوداګریزو او استوګنیزو برخو له لوري د ورکړې کموالی د یاد شرکت په عوایدو باندې منفي اغیزه کړې او په اوس وخت کې یې یاد شرکت له مالي ستونزو سره مخ کړی دی. نوموړي زیاته کړه د هغې هوکړې له مخې چې افغانستان یې د برښنا ورکوونکو هیوادونو سره لري باید د وارداتي برښنا پیسې په خپل وخت سره وکړو او دا هغه مهال امکان اري چې موږ د شرکت عواید په نورمال ډول را ټول کړو.
په دې غونډه کې د افغانستان برښنا شرکت مدیره پلاوي دې پریکړې ته ورسیدل چې د یادې ستونزې د هوارولو لپاره باید درې موضوګانې تر بررسۍ لاندې ونیول شي. لومړی باید د افغانستان حکومت له دیپلوماتیکو لارو څخه د برښنا صادرلو هیوادونو په ځانګړی توګه ازبکستان سره مذاکره وکړي څو د برښنا پیسو په اخیستلو کې له ځان څخه انعطاف پذیزي وښیې څو د افغانستان برښنا شرکت باندې فشار را کم شي، دویم د افغانستان حکومت له سیستکا سره باید خبرو ته دوام وکړي څو هغوې د امنیتي ځواکونو د برښنا پیسې ورکړي او درېمه دا چې د افغانستان برښنا شرکت د پخوا په څیر د برښنا بلونو ویش ته دوام وکړي او خلکو ته عامه پوهاوی ورکړی شي څو په نورمال ډول د برښنا دوام لپاره خپلې پیسې په خپل وخت سره تصفیه کړي
همداشان غوندې ټینګار وکړ چې د افغانستان برښنا شرکت بیړني حالت ته په کتو سره یاد وضعیت ته د رسیدو لپاره په مشخصو پروګرامونو کار وکړي. او یاد شرکت دې د انرژۍ د ضایعاتو مخه ونیسي او اداري غیر ضروري لګښتونه دې را کم کړي، مالیې وزارت به هم د پخوانۍ هوکړې له مخکې د دولتي ادارو پورونه د دې ادارو له بودیجې څخه ورکړي.
