د تورخم ګمرک ډیجیټلي تلې د اسیکوډا له سیستم سره وصل او ګټې اخیستنې ته وسپارل شوې
د تورخم ګمرک ډیجیټلي تلې نن د چنګاښ میاشتې په ۲۴ مه نېټه د اسیکوډا له سیستم سره وصل او ګټې اخیستنې ته وسپارل شوې.
د اسیکوډا له سیستم سره د دې تلو نښلولو موخه د عوایدو په راټولولو کې روڼتیا، له اداري فساد سره مبارزه، د اداري پروسو او بروکراسۍ لنډول او په ټوله کې د سوداګریزو محمولو دقیق کنټرول او مشخص کول دي.
د مالیې وزارت نوماند او سرپرست وزیر ښاغلي عبدالهادي ارغندیوال، د ننګرهار د والي مرستیال ښاغلي تمیم عارف مومند، د ولایتي شورای استازو، خصوصي سکټور او د مالیې وزارت یو شمېر رئیسانو او کار کوونکو د یادو تلو د نښلولو په مراسمو کې ګډون کړی وو.
د مالیې وزارت نوماند او سرپرست وزیر ښاغلي عبدالهادي ارغندیوال، د مراسمو په ترڅ کې وویل:" د ادارو په ځانګړي توګه د عوایدي سرچینو په مډرن کولو کې زموږ د رول په پام کې نیولو سره مالیه وزارت دا خپل مسؤلیت بولي؛ څو د کاري بهیرونو د اصلاح او د سیستمونو د پراختیا له لارې د ملي عوایدو راټولو په پروسه کې روڼتیا رامنځته او د امکان تر حده د فساد او خپل سریو مخه ونیول شي. تر دې دمه د تورخم، اسلام کلا، نیمروز او سپین بولدک په ګمرکونو کې ډیجیټلي تلې نصب شوي دي او د حیرتانو، اقینې، شیرخان بندر، ډنډپټان او ابو نصر فراهي په ګمرکونو کې یې د نصبولو چارې روانې دي.
د مالیې وزارت سرپرست زیاته کړه:" په عصري وسایلو د ګمرکونو سمبالول او د ډیجیټلي تلو نصبول د مافیایي کړیو لپاره د اندېښنې وړ او د مالیې وزارت له اړینو کارونو او لومړیتوبونو څخه ده، چې انشاء الله په بشپړه اراده او غوڅ جدیت سره به د هیواد په ټولو ګمرکونو کې دا لړۍ پلي شي.
همدا شان د مالیې وزارت سرپرست وویل، چې موږ له اداري فساد سره په غوڅ ډول مبارزه کوو او مفسدینو ته به اجازه ورنکړو،څو زموږ ملي عواید په خپلو منګولو کې ونیسي.
د ننګرهار د والي مرستیال ښاغلي تمیم عارف مومند، د مالیې وزارت سرپرست او راغلي پلاوي ته د ښه راغلاست ترڅنګ وویل، چې د روڼتیار رامنځته کولو، سیستم جوړولو او له فساد سره د مبارزې په برخه کې د مالیې وزارت له لوري د ډیجیټلي تلو نښلول یو نېک ګام دی. نوموړی؛ د افغانستان حکومت په ځانګړي ډول د مالیې وزارت له لوري د تورخم په ګمرک کې د سیستمونو د پراختیا او ودې غوښتونکی شو.
د خصوصي سکټور په استازولۍ ښاغلي ډاکټر مخلص محمد، د تورخم په ګمرک کې د ډیجیټلي تلو د نصبولو د هرکلي ترڅنګ د ملي سوداګرو او خصوصي سکټور په ستونزو وغږېده او د مالیې له وزارت څخه یې وغوښتل څو د دوی ستونزو ته د رسېدو ترڅنګ اړینې او ګڼې اسانتیاوې ورته برابري کړي.
د یادونې وړده، چې د عوایدي سرچینو لا روڼتیا، له فساد سره مبارزې او د ګمرکونو عصري کولو او د سیستمونو د پراختیا په برخه کې د مالیې وزارت د هیواد په ټولو ګمرکونو کې ډیجیټلي تلې، کمرې او پرمختللي سکنرونه پېرلي او د نصبولو چارې یې روانې دي
