د پراختیایې پروژو په پلي کیدو کې د لا اغیزمنتوب را منځته کولو په موخه د افغانستان بیا رغونې وجهي صندوق د غړو ناسته جوړه شوه
د افغانستان بیا رغونې وجهي صندوق د غړو ناسته نن د کب میاشتې په ۱۵ مه نېټه د مالیې سرپرست او د زیربناء په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، د اوبو او برېښنا وزارت سرپرست، د اړوندو ادارو مرستیالانو، د افغانستان لپاره د نړیوال بانک رئیس، د افغانستان لپاره د اروپایې ټولنې ځانګړي استازي، په کابل کې د یوناما دفتر استازي او د افغانستان بیا رغونې وجهي صندوق (ARTF) د مرسته کوونکو هیوادونو سفیرانو او استازو په ګډون د هغو پراختیایې پروژو په پلي کیدو کې چې د یاد صندوق لخوا تمویلیږي د لا زیات اغیزمنوب د را منځته کولو په موخه جوړه شوه.
په دې ناسته کې د افغانستان اقتصادي لرلید، د هغو پراختیایې پروژو په پلي کیدو چې د یاد صندوق لخوا تمویلیږي، د حکومت پراختیایې اجنډا په پلي کولو او د حکومت د پراختیایې اجنډاء په پلي کیدو کې د افغانستان د بیا رغونې وجهي صندوق د پروګرامونو په رول، د یادو پروژو پر وړاندې په شته ستونزو او ننګونو، همداشان د راتلوونکی لپاره په پلان شویو پروژو بحث او د نظرونو تبادله وشوه.
همدا راز په دې ناسته کې د مالیې وزارت لخوا په جلا جلا پریزنټیشنونو کې ځان بسیاینې ته د رسیدو لپاره د حکومت په پانګه ونې، په لومړیتوب لرونکو سکټورونو کې په پانګې اچونې، مالي ثبات، د کرنې وزارت په پروژو، د یادو پروژو په اقتصادي او مالي ګټو، د برېښنا په لیږد او ویش، د مسکن په برخه کې په پانګه ونې او د افغانستان اقتصادي لرلید په اړه ګډونوالو ته معلومات وړاندې شول.
د افغانستان بیا رغونې وجهي صندوق غړو د دا ډول ناستو جوړیدل د پراختیایې پروژو په روڼتیا او اغیزنتوب کې ګټورې وبللې او ستاینه یې وکړه او یو ځل بیا یې له افغانستان سره د خپلو همکاریو د دوام ډاډ ورکړل.
