د نیمروز په ګمرک کي څه باندي شپږ څلوېښت ټنه تاریخ تېر توکي وسوځول سول!
چهارشنبه د کب ۸مه ۱۴۰۳ هـ.ل
د مالیې وزارت د نیمروز ګمرک ریاست له ولایتي ادارو سره په همغږۍ (۲۹۲۷۰) کیلو ګرامه تاریخ تېر خوراکي او غیر خوراکي توکي او (۱۷۲۳۰) کیلو ګرامه تاریخ تېر درمل، چي د یاد ګمرک په هنګرونو کي ئې شتون درلود؛ د اړوندو ادارو د صلاحیت لرونکي پلاوي په شتون کي وسوځول.
دغه تاریخ تېر قاچاقي توکي، چي د هیواد په بېلابېلو سیمو کي نیول سوي وو، د نیمروز ولایت په ګمرک کي له راټولولو وروسته، له اړوندو ادارو سره په همغږۍ وسوځول سول.
هېره دي نه وي، چي د مالیې وزارت تل هڅه کوي، څو هیواد ته د تاریخ تېر او بې کیفیته توکو له را واردولو څخه مخنیوی وکړي او د له منځه وړلو په برخه کي ئې هم اړین اقدامات ترسره کوي.
