د پاچا خان نړیوال پوهنتون د جوړیدو کاري کمېسیون څلورمه ناسته جوړه شوه
د پاچا خان نړیوال پوهنتون د جوړیدو کاري کمېسیون څلورمه ناسته نن د غبرګولي میاشتې په ۱۲مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ په مالیې وزارت کې جوړه شوه.
د پاچا خان نړیوال پوهنتون چې د افغانستان په خوست ولایت کې جوړیږي اوس مهال د یاد ولایت په ۲ برخو کې ورته ځمکه په نښه شوی ده. کمیسیون په دې اړه له هر اړخیز بحث وروسته پریکړه وکړه چې د یادو ځمکو د تخنيکي هر اړخيزه څيړنې په موخه دې له کابل څخه د اړوندو ادارو یو پلاوی خوست ولایت ته سفر وکړي چې د پوهنتون د جوړیدو لپاره له یادو شویو برخو څخه یو یې وټاکي.
همداشان کمېسیون د پاچاخان پوهنتون د اکاډمیک پلان د جوړیدو په اړه هم بحث وکړ.د ماليې وزير هدايت ورکړ چې په دې اړه دې د متخصصو کسانو نظرونه واخیستل شي.
د مالیې وزارت سرپرست د لوړو زده کړو وزارت ته دنده وسپارله چې د یاد پوهنتون لپاره دې ژر تر ژره اکاډمیک پلان جوړ او د کمېسیون راتلوونکې غونډې ته دې وړاندې کړي.
