د مالیې وزارت په کاري حوزه کي د فساد او بروکراسۍ د مخنیوي په موخه د خلکو شکایتونه له نږدې اورېدل کيږي
د مالیې وزارت د دفتر لوی ریاست مشرتابه ستونزو ته د رسېدو، شکایتونو او وړاندیزونو اورېدو او اصلاحي پروګرامونو پلي کولو په موخه په اونۍ کي دوې ورځي ( یکشنبه او چهارشنبه) له خلکو سره په مستقيم ډول لیدنه کوي او هغه ستونزي او ننګوني چي د هېواد ملي سوداګر، خصوصي سکټور، متشبثین او عام وګړي ورسره مخ دي، د قانون په رڼا او د وظیفوي صلاحیتونو په چوکاټ کي حل لاري ورته ومومي. د دې پروګرام ځانګړې موخه د مالیې وزارت په کاري حوزه کي د خلکو ستونزو ته رسېدنه او د بروکراسۍ مخنیوی دئ. د مالیې وزارت د دغه اغېزمن اقدام په رامنځته کولو سره به د هېواد ټول ذکر سوي قشرونه خپلي ستونزي، نیوکي او ګټور وړاندیزونه په حضوري بڼه د مالیې وزارت د دفتر له لوی رئیس سره په ټاکل سویو ورځو کي شریکوي، ترڅو د حللارو، غوره چارو او خدمت وړاندي کولو لپاره د مالیې وزارت سره همکار پاته سي او د خلکو او حکومت ترمنځ واټن له منځه ولاړ سي.
د یادونې وړده، چي په دغه پروګرام کي د نوملیکني او ګډون لپاره شکایت کوونکي تر ټاکلي نېټې یوه ورځ مخکي د دفتر عمومي ریاست د تشریفاتو څانګي ته تشریف راوړي او خپل شکایتونه او وړاندیزونه ثبتوي.
