مالیې وزارت د اطلاع رسونې په برخه کې د دولت په کچه غوره مقام تر لاسه کړ
د دولتي ویب سایټونو د ارزونې سروې له مخې چې په دې وروستیو کې اطلاعاتو ته د لاسرسي کمېسیون له لوري تر سره شوې ده، مالیې وزارت د اطلاع رسونې په برخه کې د دولت په کچه غوره مقام تر لاسه کړ.
په هغه خبري کنفرانس کې چې نن د زمري میاشتې په ۱۶ مه نېټه اطلاعاتو ته د لاسرسي کمېسیون له لوري د حکومت د رسنیو په مرکز کې جوړ شوی وو، د دولتي ادارو له ویب سایټونو څخه د یاد کمېسیون د ارزونې راپور د رسنیو په شتون کې له اړوندو دولتي ادارو سره شریک شو.
په دې ارزونه کې ۵۲ دولتي ادارې شاملې وې، چې په دې اساس ادارې په دریو برخو؛ غوره ادارې د نمرو فیصدي یې تر ۹۰ سلنې، متوسطې ادارې چې د نمرو فیصدي یې تر ۷۰ او کمروزې ادارې چې د نمرو فیصدي یې تر ۵۰ وي ویشل شوې وې.
اطلاعاتو د لاسرسي کمېسیون د راپور موندنې له وړاندې خپاره شویو اطلاعاتو له مخې اطلاعاتو ته د لاسرسي قانون د پنځلسمې مادې سره سم ترتیب شوی چې له مخې یې ټولې دولتي ادارې باید د یادې مادې ټول بندونه او شاخصونه د اطلاعاتو په خپرولو کې په جدي توګه په پام کې ونیسي.
له دې وروسته به اطلاعاتو ته د لاسرسي کمېسیون د دولتي ادارو له ویب سایټونو څخه شپږ میاشتې وروسته ارزونه کوي چې په لومړۍ ارزونه کې یې مالیې، کرنې، اوبولګونې او مالدارۍ، عامې روغتیا وزارتونه او د کابل ښاروالۍ هغه ادارې دي چې د دې ارزونې تول شاخصونه یې پوره کړي او د اطلاع رسونې په برخه کې د غوره ادارو په توګه پیژندل شوي دي.
د یادونې وړ ده چې د مالیې وزارت رهبري د بیان ازادۍ اصل او اطلاعاتو ته د لاسرسي حق ته ژمن دی او تل دا هڅه کوي چې اطلاعات او معلومات له بېلابیلو لارو په جامع، دقیق او معتبر ډول له خلکو او رسنیو سره شریک کړي.
