مالیې وزارت له لوري پر مالیاتي قوانینو د پوهاوي سیمینار وړاندي سو
د مالیې وزارت د عوایدو لوي ریاست له لوري د مالیاتي قوانینو، طرزلعمولونو، لارښودونو، لایحو، سیسټمونو او لاسته راوړنو د پوهاوي یو ورځینی سیمینار په کابل پوهنتون کي د یاد پوهنتون د بېلابیلو څانګو محصلینو ته وړاندي سو.
د پوهاوي په دغه سیمینار کي د عوایدو لوي ریاست تخنیکي مرستیال عبدالولي نوري د پرزینټيشن په بڼه د افغانستان د مالیاتو د پرمختک تاریخي بهیر، د مالیاتي قوانینو د تعدیل پر اړتیاوو، مالیاتي قوانینو ته په کتو د مالیاتو د ډولونو، پر عایداتو مالیات، په انتفاعي معاملو مالیات، موضوعي مالیات، ثابت مالیات، د ملکیتونو او شتمنیو د انتقال مالیات، همدا رنګه؛ د مالیاتي معافیتونو، د مالیاتو د ټاکلو او ورکړي، د مالیاتو د ورکړي پر طریقو، د مالیه ورکونکو پر حقونو او مکلفیتونو او پر اړوندو نورو برخو هر اړخیز معلومات وړاندي سول.
د افغانستان د مالیاتي نظام په تړاو ددغه هر اړخیز معلوماتي، علمي سیمینار د ترسره کولو له امله محصلینو هم خوښي څرګنده کړه او د مالیې وزات څخه یې مننه وکړه، چي د معلوماتو او ظرفیت لوړوني په موخه داسي ګټور معلوماتي او علمي سیمینارونه په لاره اچوي.
د سیمینار په لړ کي د محصلینو پوښتنو ته هر اړخیز ځوابونه رکړل سول او د هغوي نظرونه او وړاندیزونه هم واورېدل سول.
د یادوني وړ ده، چي د ماليې وزارت تل هڅه کوي، تر څو د خپلو مسؤلیتونو اړوندو برخو کي هېوادوالو ته معلوماتي سیمینارونه پر لاره واچوي، تر څو د مالیې وزارت د فعالیتونو، مسؤلیتونو او لاسته راوړنو په تړاو لازم معلومات وړاندي سي او هم به د ظرفیت لوړوني او مسلکیتوب په برخو کې ګټوري پایلي ولري.
