ښاغلی حبیب ځدران د مالیې وزارت د اداري معینیت د سرپرست په توګه معرفي شو
ښاغلی حبیب ځدران د ولسمشرۍ عالي مقام د حکم له مخې نن د وري میاشتې په ۲۰ مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، له لوري د مالیې وزارت د اداري معینیت د سرپرست په توګه معرفي شو.
په دې پیژندغونډه کې چې د مالیې وزارت یو شمېر رئیسانو او کارکوونکو ګډون کړې وو، د مالیې وزارت سرپرست د پخواني اداري معین ښاغلي فرید حکمت چې د شخصي معاذیرو له امله یې استعفاء وکړه له کړنو او فعالیتونو څخه مننه وکړه او د مالیې وزارت د نوي ټاکل شوي اداري معین ښاغلي حبیب ځدران ته یې په اړوندو چارو کې د بریالیتوب غوښتنه وکړه.
ښاغلي حبیب ځدران د جلالتماب ولسمشر او د مالیې وزارت سرپرست د باور څخه مننه وکړه او وویل چې د نورو ادارو په مرسته هڅه کوم چې د مالیې وزارت پلانونه او اهداف عملي کړم. نوموړي له ټولو کارکوونکو څخه غوښتنه وکړه چې د چارو د لا ښه تر سره کیدو په موخه له ده سره هر اړخیزه همکاري وکړي.
د یادونې وړ ده چې ښاغلی حبیب ځدران په مالي او سوداګرۍ برخه کې د ماستړۍ تر کچې لوړې زده کړې کړي او له دې وړاندې د عوایدو لوی رئیس، د لویو مالیه ورکوونکو د رئیس او په دې وروستیو کې د مالیې وزارت د ستر سلاکار په توګه دندې تر سره کړي دي.
