محترم حبیب ځدران به حیث سرپرست معینیت اداری وزارت مالیه رسماً معرفی گردید
محترم حبیب ځدران به اساس پیشنهاد وزارت مالیه و حکم مقام عالی ریاست جمهوری امروز مؤرخ ۲۰ حمل سال ۱۳۹۸ توسط محترم پروفیسور محمد همایون قیومی، سرپرست وزارت مالیه و مشاور ارشد مقام عالی ریاست جمهوری در امور زیربناء رسماً به حیث سرپرست معینیت اداری وزارت مالیه معرفی گردید.
در این مراسم که شماری از رؤساء و کارمندان وزارت مالیه اشتراک داشتند، سرپرست وزارت مالیه از کارکردها و فعالیت های محترم فرید حکمت، معین اداری اسبق وزارت مالیه که بدلیل معاذیر شخصی استعفا نمود ابراز تشکر و قدردانی نموده و برای محترم حبیب ځدران، سر پرست معین جدیدالتقرر وزارت مالیه در تمام امور محوله آرزوی مؤفقیت کرد.
محترم حبیب ځدران ضمن تشکری از اعتماد جلالتمآب رئیس جمهور و سرپرست وزارت مالیه گفت که تلاش مینمایم تا در همکاری با سائر ادارات پلان ها و اهداف وزارت مالیه را عملی سازم. وی از تمام کارمندان درخواست نمود تا به منظور پیشبرد هرچه بهتر امور با وی همکاری همه جانبه نمایند.
قابل تذکر است که محترم حبیب ځدران دارای تحصیلات عالی به سویه ماستری در بخش مالی و تجارت بوده و قبلاً به حیث رئیس عمومی عواید، رئیس مالیه دهنده گان بزرگ و اخیراً به صفت مشاور ارشد مقام وزارت مالیه ایفای وظیفه نموده است.
