د ۱۳۹۹ مالي کال د ملي بودیجې استماعیه ناستې پیل شوې
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د تلې میاشتې په ۸ مه نېټه د ۱۳۹۹ مالي کال د ملي بودیجې استماعیه ناستې په مالیې وزارت کې ترسره شوې.
د نن ورځې په استماعیه ناستو کې د عدلیې، کلیو او پراختیا، کار او ټولنیزو چارو وزارتونو او همداشان د شهیدانو او معلولینو په چارو کې د دولت وزارت مسؤلینو ګډون کړې وو چې د بودیجې د کمېټې، مدني ټولنو، د افغانستان د عامه مطالعاتو مؤسسې، د افغانستان د روڼتیار څار استازو او د ملي بودیجې عدالت غوښتونکو غړو هم شتون درلود.
په لومړي سر کې د یادو ادارو استازو ته د ۱۳۹۹ مالي کال استماعیه ناستو اصلي چوکاټ روښانه او د دې ادارو د بودیجوي اړتیاوو او امکاناتو ته په کتو د راتلونکي مالي کال په ملي بودیجه کې یې د لومړیتوبونو په پام کې نیولو په تړاو خبرې او د نظرونو تبادله وشوه.
د مالیې وزارت سرپرست ټینګار وکړ، چې د ملي بودیجې په سند کې باید هغه پروژې ورګډې شي، چې د خلکو په ژوند، اقتصادي وضعیت، کارموندنه او ملي عوایدو باندي مثبت اغېز لري او د افغانستان له اقتصادي ځان بسیاینې سره په تدریجي ډول مرسته وکړي.
د یادونې وړده، چې د ملي بودیجې استماعیه ناستې به په پرلپسې توګه له ټولو بودیجوي واحدونو سره ترسره شي.
