روسیه می خواهد سیستم مرکز گرمی مکروریانها را دوباره بازسازی کند
د مکروریانونو د مرکز ګرمي سیسټم د بیا رغوني او مکروریانونو د وضعیت بشپړي ارزوني په موخه روسي پلاوي کابل ته سفر وکړاو د مکروریانونو د ساتني او څارني دولتي شرکت د رهبرۍ هيئت له راغلي تخنیکي پلاوي سره په ګډه د مکروریانونو د تخنیکي دستګاوو او مرکز ګرمۍ سیستمونو د سروي او برآورد په اړه رسنیو سره مالومات شریک کړل.
په دې لیدنه کي د روسیې د اولېمپ انرژي(Olimp Energy) کمپنۍ مشر الیکسي مزیرین وویل: موږ به د افغانستان له سیمه ییزو انجنیرانو سره په ګډه کار وکړو، څو ژر تر ژره د مکروریانونو د ویجاړو سوو برخو سروي وکړو او په اړه ئې لازم تصمیم ونیسو. هغه زیاته کړه، چي موږ د مکروریانونو د دستګاوو، مرکزګرمۍ او نورو تخنیکي سیستمونو د سروي لپاره راغلي یوو، هغه امکانات لټوو چي وکولای سو ډېر ژر ټول غیر فعال سیستمونه بېرته فعال کړو، څو د مکروریانونو اوسېدونکو ته خدمات وړاندي سي.
په ورته مهال د مکروریانونو د ساتني او څارني شرکت رئیس پوهنمل غلام عمر عبدالله له راغلي پلاوي څخه مننه وکړه او زیاته ئې کړه چي د روسي انجنیرانو په همکارۍ به ډېر ژر دغه سروي پای ته ورسېږي او د سروي پایله به د دولتي شرکتونو عمومي ریاست او د مالیې وزارت محترم مقام ته وړاندی سي، څو د راتلونکي اجراآتو په موخه عملیاتي پلان ترتیب او عملي کار پیل سي.
نوموړي دغه راز د مکروریانونو اوسېدونکو شکایتونو ته په اشارې وویل: دا تاسیسات شاوخوا څلوېښت کاله وړاندي جوړ سوي چي د وخت په تېرېدو ئې خپل کیفیت له لاسه ورکړی، چي له بده مرغه د تېر نظام مسولینوهم یادو برخو ته پام ونه کړ او د فساد له کبله دغه سیستمونه جوړ نه کړای سول. همداراز په خپلو خبرو کي د مکروریانونو د اوبو ستونزي ته په اشارې وویل: په دې برخه کي هم د ۳۵ میلیون افغانیو په ارزښت یوه پروژه په لار اچول سوې او ډېر ژر به یاده ستونزه تر یوه بریده حل سي.