د بنسټیزو او لومړیتوب لرونکو پروژو د پېژندني په موخه ناسته وسوه
د مالیې وزارت د عامه پانګه اچوني لوی ریاست د زېربناوو د شریکوني تخنیکي بورډ د بنسټیزو او لومړیتوب لرونکو پروژو د پېژندلو او په (۱۴۰۲) هجري لمریز کال کي ئې د پلي کولو په موخه ناسته وکړه.
دغه ناسته د مالیې وزارت اداري معین او د پالیسۍ معینیت کفیل (مولوي حمد الله زاهد) په مشرۍ او د عامه پانګه اچوني او زېربناوو لوی رئیس (محمد صابر نثار) او د زېربنايي وزارتونو او ادارو د استازو په ګډون د دغه وزارت په خیبرهال کي ترسره سوه.
مولوي حمدالله زاهد، د دې غونډي په پرانیستې وینا کي وویل، د زېربنایي پروژو بیا رغونه او پلي کول به د خلکو پر اقتصادي وضعیت د پام وړ آغېز وکړي. لکه څنګه چي دا پروژې د خلکو له مالیاتو تمویلېږي، نو باید اساسي او لومړیتوب لرونکي پروژې په پوره همغږۍ او همکارۍ په ګوته او پلي سي، ترڅو د مالي وجهي د ضایع کېدو مخه ونیول سي.
ورپسې محمد صابر نثار او ګډونوالو د اداراتو لخوا د (۱۴۰۲) کال د شریکو سوو پروژو او د بنسټیزو پروژو د پېژندني، د ټولګټو او معلوماتي ټکنالوژۍ وزارتونو د زېربناوو د شریکوني د تړون مؤثریت، د معلوماتي تکنالوژۍ وزارت، اوبو رسوني شرکت، د افغانستان برېښنا شرکت او کابل ښاروالۍ ترمنځ د هوکړه لیک ترتیب، د هيواد په کچه د ولایتي ښاروالیو د ولایتي پروژو شریکول، د (۱۴۰۲) کال د پروژو شریکوني بهیر او د شریکو سوو پروژو د ستونزو او نیمګړتیاوو په تړاو بحث او د نظرونو تبادله وکړه.
په پای کي پرېکړه وسوه، چي ادارې دي د (١٤٠٢) مالي کال پلانونه ترتيب او د اړینو پرېکړو په موخه دې له ماليې وزارت سره شريک کړي.
