د قوش تېپې کانال لومړي فاز چاري څه باندي اته څلوېښت سلنه بشپړي سوي دي

د ۱۴۰۱ کال په بهیر کي د افغانستان په شمال زون کي د قوش تېپې کانال د ملي پراختیا شرکت له لوري پیل او د کرنیز افغانستان لپاره د اوبو د کنټرول نوی باب پرانیستل سو، چي سلګونه هکټاره ځمکه به تر پاکو اوبو لاندي او د کار موندني ترڅنګ به کرنه د ځان بسیایني پر لوري بوزي. د قوش تېپې کانال د لومړي فاز چاري څه باندې اته څلوېښت سلنه بشپړي سوي دي، چي په ټوله کي درې فازه لري.
ملي پراختیا شرکت د کال په سر کي د دې پروژې لپاره د ماشینرۍ ډېرېدو او کیندني د حجم زیاتېدو ژمنه کړې وه، چي  د ماشینرۍ شمېر به یې ۲۰۰۰ ته رسېږي، په داسي حال کي چي د نهو میاشتو په تېرېدو سره د ماشینرۍ شمېر ۳۳۸۶ ته رسېږي او په پایله کي د کیندنې حجم څه له پاسه ۷۲۰ زره مټره مکعبه ته لوړ سو. د چارو پرمختګ د دې څرګندویي کوي، چي د کانال د بشپړاوي چاري به تر ټاکل سوي مودې وړاندي ترسره سي. ځکه چي ورځنی کاري هدف  ۳۶۰ زره مټره مکعب وو، ولي اوس د مسلکي او با تجربه کسانو او ماشینرۍ په ډېرښت سره ۷۲۰ زره مټره مکعبه ته لوړی سوی دئ.
دا مهال د قوش تېپې کانال د لومړي فاز چاري په ۱۱۴ نقطو کي ۱۰۸ کیلو مټره په چټکۍ سره پرمخ رواني دي او د بېلا بېلو قومونو استعدادونه او کدرونه له ۵۵۰۰ زیات کسان کار پکښي کوي. د دغي ستري او ملي پروژې ټول مالي لګښت د خپل کور افغانستان له ملي بودیجې ورکول کيږي، چي ۸.۲ میلیارده افغانۍ ده او دا ثابتوي چي د هیواد د پرمختګ لپاره د چا مرستو ته اړتیا نه لرو؛ بلکي پر خپل همت او مټو باور لرو.
په دغه ستره او ملي پروژه کي هیله بخښونکی خبر دا دی، چي د شرکتونو چارې یې ښې رواني کړي دي، د اینوایسونو پر وخت اجرا کول او په ټاکلي موده کي د پیسو ورکړه ده او د شرکتونو اړتیاوي پر وخت رفع کيږي او د ملي پراختیا شرکت پرېکړه دا ده، چي اینوایسونه انلاین سي او په یوه ورځ کي د شرکت د ټاکلي کار پیسې ورکړل سي.
د چارو د لاښه پرمختګ او کاري ټیم ته د هیوادنۍ انرژۍ په ورکړه سره د هیواد لوړ پوړي مسؤلین وخت ناوخته ورځي او څارنه یې کوي. د لومړي فاز له بشپړېدو سره به د دویم فاز چاري هم پیل سي او د افغانستان اسلامي امارت په پوره ایماندارۍ ورته ژمن دئ.
یادونه: د قوش تېپې کانال ۲۸۵ کیلو مټره اوږد، ۱۵۲ مټره پلن او ۸.۵ مټره ژور دئ. دغه کانال د آمو سرشاره سیند اوبه خپلي غېږي ته را ګرځوي او د وچو دښتو سپېرې سینې به زرغونې کړي.