د کورنۍ پلټني لوی ریاست پلاوي پروان، کاپیسا او پنجشیر ولایتونو ته سفر وکړ!
د چنګاښ ۱۶مه ۱۴۰۴ هـ.ل
د مالیې وزارت د کورنۍ پلټني لوی رئيس الحاج ملا عبدالهادي ابرار په مشرۍ پلاوي پروان، کاپیسا او پنجشیر ولایتونو ته سفر وکړ، چي د مستوفیتونو د چارو د ارزوني ترڅنګ ئې له مسئولینو سره هم په جلا توګه وکتل.
دغه پلاوي په دې کتنه کي د پلټني د ارزښت، مؤثریت او اهمیت په اړه له مسئولینو سره خپل نظر شریک کړ او دوی ته ئې وویل، چي د مالیې وزارت رهبري د مستوفیتونو او ګمرکونو په چارو کي روڼتیا او اصلاحاتو راوستو ته ژمنه ده، چي دا کار د لوی ریاست او اړوندو ادارو ترمنځ د همغږۍ او همکارۍ په پایله کي شونی دئ. دوی د تېرو پلټنو په لړ کي د پلټونکو له لوري د ورکړل سویو سپارښتنو د تطبیق څرنګوالی تعقیب کړ او له مسئولینو ئې وغوښتل، چي د چارو د سمون په موخه د پلټني سپارښتني په ټاکلي موده کي تطبیق او راپور ئې له دې ریاست سره شریک کړي.
تللي پلاوي په پای کي د هغوی کاري راپورونه ولیدل، ستونزي او غوښتني ئې واورېدې او د مالیې وزارت له مشرتابه سره د ستونزو شریکولو او حلولو د ډاډ ترڅنګ ئې له دوی څخه د تېر په څېر د همکارۍ او ریښتیني کار غوښتنه وکړه.
د یادوني وړ ده، چي پورته ادارو د وروستیو پلټنو ډېری سپارښتني تطبیق کړي او هیله ده، چي پاتي سپارښتني به هم ژر تر ژره پلي کړي.
