د مالي او حسابي برخي روزنیز پروګرام فارغانو ته ستاینلیکونه او تصدیق پاڼي ورکړل سوې!
د زمري ۶ مه ۱۴۰۴هـ.ل
د مالیې وزارت د خزاینو لوی ریاست د بودیجوي واحدونو مالي او حسابي مسئولینو ته چي د مالي او حسابي برخي له روزنیز پروګرام څخه فارغ سوي ول، د یو لړ مراسمو په ترڅ کي تصدیق پاڼي او ستاینلیکونه ورکړل سول.
په دې مراسمو کي د مالیې وزارت مالي معین حاجي عبدالقدیر احمد، د خزاینو لوی رئیس نصرت الله محمود، د بودیجې لوی ریاست اجرائیوي رئیس حبیب الله حبیب سباوون، د دعوت او ارشاد رئیس مولوي عبدالهادي سیف الخالد او یو شمېر نورو مسئولینو ګډون کړی وو.
د خزاینو لوی رئیس د روزنیز پروګرام د اهدافو او لاسته راوړنو په اړه خبري وکړې او زیاته ئې کړه، چي د بودیجوي واحدونو په مالي برخو کي له ډېرو ستونزو سره مخ وو او د دې ستونزو د حل له پاره څو پروګرامونه په لاره واچول سول. الحمد لله، دا پروګرامونه ګټور او مثبت ول او ستونزي او نیمګړتیاوي ئې حل سوي دي.
د مالیې وزارت مالي معین په خپله وینا کي وویل، چي د ټولو چارو له پاره علم او پوهه اړینه ده. د علم او پوهي سربېره، اسلام په عملي مهارتونو هم ټینګار کوي ځکه، چي مسلکي مهارتونه خلکو ته دا وړتیا ورکوي، چي خپلي ټولني ته خدمت وکړي او د هغوی اړتیاوي پوره کړي. یوازي په دې پروګرام قناعت مه کوئ؛ بلکي خپل مهارتونه له هري ممکني لاري لوړ کړئ.
د ملي بودیجې لوی ریاست اجرائیوي رئیس په خپله وینا کي وویل، چي مالي سيکټور، د هر اقتصادي نظام د اصلي ستنو په توګه، په اقتصادي پرمختګ، ثبات او وده کي مهم رول لوبوي. هغه څه چي تاسو زده کړي د ضایعاتو د مخنیوي او روڼتیا د رامنځته کېدو په موخه ئې له خپلو همکارانو سره شریک کړئ.
د لوړو زده کړو وزارت مالي او حسابي رئیس د روزنیز پروګرام د ګډونوالو په استازیتوب د ذکر سوي پروګرام له جوړوونکو څخه مننه وکړه او زیاته ئې کړه، چي موږ د (۱۵) ورځو په اوږدو کي ډېر څه زده کړل، چي د مالي چارو د نظم او روڼتیا رامنځته کولو له پاره اړین دي. هغه د داسي پروګرامونو د دوام غوښتنه وکړه.
د مراسمو په پای کي، د بودیجوي واحدونو جوړوونکو او مالي او حسابي مسئولینو ته چي دا روزنیز پروګرام ئې په بریالیتوب سره بشپړ کړی وو، ستاینلیکونه او تصدیق پاڼي ورکړل سوې.
