د عوایدو او ګمرکونو معینیت د اړوندو ادارو ترمنځ د همغږۍ یوولسمه ناسته وشوه
د غویي۱۵مه١٤٠٥ هـ.ل
د مالیې وزارت د ګمرکونو او عوایدو معین الحاج مفتي عبدالمتین سعید په مشرۍ د دغه معینیت د اړوندو ریاستونو د رئیسانو او مسئولینو په ګډون د اداري چارو د یوشان پرمخ بیولو او پراختیا په موخه د همغږۍ یوولسمه ناسته وشوه.
د لسمې ناستې پر مهال ټاکل شویو پلاوو ته د سپارل شویو مسئولیتونو د اجراآتو راپورونه واورول شول.
همدا شان په دې ناسته کې په رسمي وخت کې د کارکوونکو په څارنه، د اړوندو ادارو له لوري د فیسونو د اخیستلو په برخه کې د اسانتیا رامنځته کولو په موخه د واحد سیسټم په جوړولو، د کنټرول او کیفیت ریاست د عوایدو د راټولولو پر څرنګوالي، په بېلابېلو برخو کې مراجعینو ته د لازمو اسانتیاوو پر رامنځته کولو او یو شمېر نورو مهمو موضوعاتو په اړه هر اړخیز بحث ترسره او لازمې پرېکړې وسوې.
د یادولو وړ ده، چې د ګمرکونو او عوایدو معینیت د همغږۍ ناستې هره میاشت د اړوندو ریاستونو ترمنځ د کاري اړیکو د پراخېدو او د موجوده ستونزو د حل په موخه ترسره کېږي.
