د مالیې وزارت د حکم پر بنسټ یو شمېر ولایتونو ته نوي مستوفیان ور وپېژندل سول
د افغانستان اسلامي امارت د مالیې وزارت د ځانگړي حکم پر بنسټ او کار اهل د کار ته دسپارلو، له مسلکي کادرونو څخه په بېلابېلو موقفونو کي اغېزمني ګټني اخیستلو په توګه د ماليې وزارت د عوایدو لوی رئیس ښاغلي الحاج شېر محمد مشفق له خوا د بلخ، پروان، پکتيا، غزني، لغمان او ننگرهار ولایتونو لپاره نوي مستوفيان د دغه ولایتونو والیانو او اړوندو کارکوونکو ته ور وپېژندل سول.
د پېژندغونډو پر مهال د مالیې وزارت د عوایدو لوی رئیس ښاغلي مولوي شېر محمد مشفق، ګډونوالو ته یادونه وکړه، چي ولایتونو ته مستوفيان د مالیې وزارت د حکم او لزوم دید پر بنسټ ټاکل کېږي، تغییر او تبدیل هغه اصل دی چي تجربې سره شریکېږي او نوښتونه رامنځته کېږي. نوموړي، د یادو ولایتونو له مخکنیو مستوفیانو څخه مننه وکړه، چي په خپلو کاري مودو کي ئې غوره خدمات وړاندي کړي او د ملي عوایدو په را ټولو کي ئې چټګ ګامونه پورته کړي دي. همدا راز نوموړي، نویو مستوفیانو ته په ور سپارل سویو چارو کي د لا بریا او ښو خدمتونو وړاندي کولو غوښتنه وکړه.
د يادونې وړ ده، چي ښاغلی منصورالحق ذاکر د بلخ ولايت، ښاغلی مولوي عبدالوهاب د پروان ولايت، ښاغلی ضياء الحق عثمان د پکتيا ولايت، ښاغلی مولوي محمد فاروق انصاري د لغمان ولايت او ښاغلی عصمت الله سليمي د ننگرهار ولايت د مستوفيانو په توګه معرفي سول.
