د مالیې وزارت نویو ګومارل سوو کارکوونکو ته د کمپیوټر دوه میاشتنی روزنیز کورس جوړ سو!
د مالیې وزارت د بشري سرچینو ریاست د مرکز نویو ګومارل سوو کارکوونکو ته د کمپیوټر دوه میاشتنی روزنیز کورس جوړ کړ.
د دغه پروګرام په پرانیستغونډه کي، چي د دغه وزارت په خیبرهال کي جوړ سوې وه، د بشري سرچینو رئیس مولوي احمدشاه شاکر، د معلوماتي ټکنالوژۍ رئیس عمران احمد فرحان او یو شمېر نورو مسؤلینو ګډون کړی وو.
د بشري سرچینو رئیس مولوي احمدشاه شاکر د غونډي ګډونوالو ته په خطاب کي وویل، خوښ یم، چي ستاسي په څېر ځوانان په دې نظام کي حضور لري، د دې نظام د پیاوړتیا او د شهیدانو د پاتي ارمانونو د پوره کولو لپاره هیڅ ډول هڅي مو ونه سپموئ او لکه څنګه مو، چي د جګړې په ډګر کي د دغه اسلامي نظام دښمنان مات کړل، د مسلکي پوهي په ترلاسه کولو او د خپل ظرفیت او وړتیا په لوړولو سره په اقتصادي، فرهنګي، اخلاقي او د ټکنالوژۍ په ډګر کي هم پوره هڅي وکړئ. دا نظام د لا پیاوړتیا او راتلونکي نسل ته د یوې الګو په توګه اقتصادي او فرهنګي کار ته اړتیا لري.
د معلوماتي ټکنالوژۍ رئیس عمران احمد فرحان په خپلو خبرو کي وویل، چي دغه روزنیز پروګرامونه ستاسو د پوهي د کچي د لوړولو او د کاري وړتیا لوړولو لپاره یو ښه فرصت دئ؛ ترڅو په خپله کاري برخه کي اغېزمن تمام سئ؛ نو له روزنیزو پروګرامونو څخه پوره ګټه پورته کړئ او هغه څه چي په نظري بڼه زده کوئ په عمل کي ئې هم پلي کړئ.
د یادوني وړ ده، چي په دغه دوه میاشتني پروګرام کي ګډونوالو ته د ورډ او اېکسل پروګرامونه تدریسېږي.
