د مستوفیتونو ممتازو کارکوونکو ته تصدیق پاڼي ورکړل سوې!
د مالیې وزارت د ګمرکونو او عوایدو ملي اکاډمۍ له تدریسي پلان سره سم، په مستوفیتونو کي د مالیه ورکوونکو د خدمتونو (۳۸) تنو او د مالیاتي حوزو (۴۵) تنو کارکوونکو ته په اړوندو برخو کي د جوړ سوي (۲۳) ورځني روزنیز پروګرام څخه ممتازو فارغانو ته تصدیق پاڼي ورکول سوې.
په همدې تړاو جوړه سوې غونډه کي د مالیې وزارت د عوایدو لوی ریاست حمایوي مرستیال مولوي منصورالحق ذاکر، د بشري سرچینو ریاست د زده کړو او ظرفیت لوړوني آمر مولوي محمد نادر همایون او د روزنیز پروګرام ګډونوالو ګډون کړی وو.
د عوایدو لوی ریاست حمایوي مرستیال مولوي منصورالحق ذاکر له ټولو کارکوونکو څخه وغوښتل، چي خپلي چاري په پوره ایماندارۍ او اخلاص سره مخ ته یوسي او په اړوندو برخو کي له هیوادوالو سره نېک چلند وکړي، ښاغلی ذاکر ټینګار وکړ، چي کارکوونکي باید له ورته روزنیزو پرګرامونو څخه پوره ګټه واخلي او خپل ځانونه په مسلکي زده کړو سمبال کړي؛ ترڅو په ور سپارل سويو دندو کي له ستونزو سره مخ نه سي.
د مالیې وزارت د بشری سرچینو ریاست د ظرفیت لوړوني آمر مولوي محمد نادر همایون وویل، چي اوسمهال د دولت ټول لګښتونه د خپلواکي ملي بودیجې څخه ترسره کېږي؛ نو اړینه ده، چي تاسو باید د ملي عوایدو په راټولولو کي له پوره روڼتیا او رښتینولۍ څخه کار واخلئ.
ښاغلي همایون ورته ښونیز پروګرامونه د کارکوونکو د مسلکي ظرفیتونو د لوړولو له پاره ګټور وبلل او زیاته ئې کړه، چي ټول مسئولین دي د مالیاتي چارو په برخه کي د هر ډول بې عدالتۍ او فساد مخنیوی وکړي.
د یادوني وړ ده، چي په دغه روزنیز پروګرام کي، یادو ګډونوالو ته د مجربو ټرینرانو له لوري د (۲۳) ورځو په جریان کي د مالیاتي قوانینو، طرزالعملونو، مالیاتي محاسبې او له مالیاتي سیسټمونو سره د بشپړي بلدتیا په موخه نظري او عملي روزنه ورکول سوه.
