د تدارکاتي پروسې روزنیزو پروګرام ګډونوالو ته تصدیق پاڼي ورکړل سوې!
د مالیې وزارت د کارکوونکو چارو ریاست د مستوفیتونو او ګمرکونو د تدارکاتي برخي (۵۰) تنو هغو مدیرانو ته تصدیق پاڼي ورکړې، چي د تدارکاتي پروسې په (۱۰)ورځني پروګرام کې ئې برخه اخیستې وه.
په هغه ناسته کي، چي په همدې تړاو د ګمرکونو او عوایدو ملي اکاډمۍ د غونډو په تالار کي جوړه سوې وه، د کارکوونکو چارو ریاست د استخدام آمر مفتي نیاز محمد منصور، د ولایتي عوایدو د انسجام او پراختیا آمر مولوي دوست محمد ثاقب، د دعوت او ارشاد ریاست مدرس شیخ محمد مبین امیني او د ګمرکونو او عوایدو ملي اکاډمۍ آمر بلال احمد احدي ګډون کړی وو.
د استخدام آمر د دغه پروګرام په پای وینا کي وویل، چي د نظام د چارو د پرمخ وړلو له پاره مسلکي کسانو او وسایلو ته اړتیا ده. د دې پروګرام موخه هم د اړوندو چارو غوره ترسره کول دي. هغه موضوعات، چي په دې پروګرامونو کي تدریس کېږي، د فساد په مخنیوي، کم کارۍ او د روڼتیا رامنځته کولو برخه کي مرسته کوي او د دغه اسلامي نظام د پیاوړتیا لامل ګرځي. تاسي مکلف یاست، چي زده کړي مسایل عملي او تر نورو ئې ورسوئ.
د دعوت او ارشاد رياست مدرس د خپلو خبرو په ترڅ کي وويل، چي دعوت او ارشاد په هره دولتي اداره کي شتون لري او د هغوی دنده د اسلامي احکامو پلي کول دي. تاسي هم د عدالت د تامين او د ظلم د مخنيوي لپاره پر نېکیو د امر او له منکراتو د ځان ساتني مسئولیت په غاړه لرئ، نوموړي همدا راز د غونډي له ګډونوالو وغوښتل، چي ورسپارل سوي دندې په اخلاص او ایماندارۍ پرمخ یوسي او له خلکو سره غوره چلند وکړي.
د یادوني وړ ده، چي په دې پروګرام کي ګډونوالو ته د مجربو ټرینرانو له لوري د تدارکاتو قانون، طرزالعمل او پروسه تدریس سوه.
