د ګمرکونو او عوایدو معینیت د اړوندو ریاستونو ترمنځ د همغږۍ ناسته جوړه سوه
د ګمرکونو او عوایدو معینیت د اړوندو ریاستونو ترمنځ د همغږۍ ناسته د ګمرکونو او عوایدو معین الحاج مفتي عبدالمتین سعید په مشرۍ د یاد معینیت د غونډو په تالار کي جوړه سوه.
په دې ناسته کي، چي د اړوندو ریاستونو مسئولینو ګډون کړی وو، په پیل کي د ګمرکونو او عوایدو معین ګډونوالو ته د ښه راغلاست ترڅنګ د چارو د لا ښه والي په موخه د ګمرکونو او عوایدو معینیت د ریاستونو ترمنځ د همغږۍ او همکارۍ په لا زیاتېدو ټینګار وکړ. نوموړي د یادو ریاستونو مسئولینو ته په مربوطه کاري برخو کي لازمي سپارښتني هم وکړې.
همدارنګه په دې ناسته کي د ولایتي او مرکزي ادارو تر منځ د همغږۍ په زیاتوالي، د هغو منفي تېلو پر برخلیک، چي اوسمهال د هیواد په یو شمېر ګمرکونو کي ولاړ دي، د شرکتونو د باقیاتو د تصفیې په موخه د ګمرکونو او مستوفیتونو تر منځ پر همغږۍ او همکارۍ او یو شمېر نورو موضوعاتو په اړه هر اړخیزي خبري وسوې او په اړه ئې لازمي پرېکړي ونیول سوې.
د دې تر څنګ په دې ناسته کي د نورم او سټنډرډ ملي ادارې د لابراتوار کړنلاري د فیسونو او د کنټرول او کیفیت ریاست د عوایدو په اړه د ټاکل سویو کمېټو راپورونه هم واورېدل سول.
د یادوني وړ ده، چي د ګمرکونو او عوایدو معینیت د اړوندو ریاستونو ترمنځ د ګډو همکاریو د پیاوړتیا په موخه د همغږۍ ورته ناستي به په راتلوونکي کي هم دوام ولري.
