د ګمرکونو او عوایدو معینیت د اړوندو ریاستونو ترمنځ د همغږۍ ناسته وسوه!
د زمري ۱۸مه ۱۴۰۴هـ.ل
د ګمرکونو او عوایدو معین الحاج مفتي عبدالمتین سعید په مشرۍ د دغه معینیت د ریاستونو ترمنځ د (۱۴۰۴) کال د همغږۍ پنځمه ناسته د یاد معینیت د غونډو په تالار کي وسوه.
په دې ناسته کي چي د یادو ریاستونو مسئولینو ګډون کړی وو، په پیل کي د ګمرکونو او عوایدو معین ګډونوالو ته د ښه راغلاست ترڅنګ له اړوندو امارتي ادارو سره د چارو د ښه والي په موخه د لازمي همغږۍ رامنځته کولو، د ملي عوایدو زیاتولو او هیوادوالو ته د لازمو اسانتیاوو رامنځته کولو په برخه کي مسئولینو ته سپارښتني وکړې.
ورپسې د عوایدو لوی ریاست ته د کنټرول او کیفیت ریاست د عوایدو د لېږد په اړه د ټاکل سوي پلاوي راپور وړاندي او پر دې سربېره د کارګو شرکتونو د بررسۍ پر څرنګوالي، د ټرانزیټي او بار وړونکو شرکتونو پر باقیاتو، د هیواد په هغو سیمو کي، چي بانکي خدمات نه لري د مالیې د اخیستلو پر څرنګوالي او یو شمېر نورو اړینو موضوعات بحث او لازمي پرېکړي وسوې.
د یادوني وړ ده، چي دغه ناستي د ګمرکونو او عوایدو معینیت د اړوندو ریاستونو تر منځ د لا همغږۍ په موخه جوړېږي، چي ورته ناستي به په راتلونکي کي هم دوام ولري.
