د مؤسسو له اتحادیې سره د همغږۍ ناسته وشوه
د وږې۱۲مه ۱۴۰۵هـ.ل
د مالیې وزارت د عوایدو لوی رئیس الحاج مولوي سفرمحمد سحر په مشرۍ، د عوایدو تخنیکي مرستیال او اړوندو آمرینو په ګډون د مؤسسو د اتحادیې له استازو سره د همکارۍ او همغږۍ ناسته وشوه.
په پیل کې د عوایدو لوی رئیس وویل، چې اسلامي امارت د مالیه ورکوونکو د ستونزو د حل او د مالیاتي چارو د اسانتیا په موخه لازمې اسانتیاوې رامنځته کړي دي او د ټولو مالیه ورکوونکو ستونزو ته د رسېدنې په برخه کې لازمې همکارۍ ته چمتو دی. نوموړي ټینګار وکړ، چې مؤسسې باید د مالیاتي چارو د ښه تنظیم په موخه وړ او مسلکي کسان معرفي او اړین اسناد پر وخت او له واقعیت سره سم مالیاتي ادارې ته وړاندې کړي؛ ترڅو یې مالیاتي چارې له ځنډ او خنډ سره مخ نه شي.
د مؤسسو او نا دولتي مؤسسو د مالي نظامونو، حقیقي عوایدو او لګښتونو، د پروژو او قراردادونو، له نورو ادارو او بنسټونو سره د کارکوونکو د صحي بیموي قراردادونو، د کرایې جایدادونو اړوند قراردادونو او د مالیاتي ثبت او پروسیس په اړه یې بحث او د نظرونو تبادله وشوه. همدارنګه مالیاتي ادارې ته د غیر انتفاعي مؤسسو له لوري د غوښتل شویو معلوماتو او اسنادو د پر وخت وړاندې کولو، د مالیاتي تصفیې په بهیر کې د ځنډ د مخنیوي، د مالیاتي معافیتونو د ترلاسه کولو او د اړوندو مالیاتي مکلفیتونو د ترسره کولو پر څرنګوالي هم بحث وشو.
په پای کې د ناستې ګډونوالو د یادو موضوعاتو په اړه خپل نظریات او وړاندیزونه شریک کړل، د هغوی پوښتنو ته د اړوندو مسئولینو له لوري وضاحتونه وړاندې شول او د عوایدو لوی رئیس له لوري د مؤسسو د ستونزو د حل او د مالیاتي چارو په برخه کې د هر اړخیزې همکارۍ ډاډ ورکړل شو.
