د عوایدو لوی ریاست استازو په زابل کي سوداګرو، صنعت کارانو او د سیکټوري ریاستونو غړو ته د مالیاتو په تړاو معلومات ورکړل
د سلواغې۲۱مه ۱۴۰۴هـ.ل
د مالیې وزارت د عوایدو لوی ریاست استازو د زابل ولایت له سوداګرو، صنعتکارانو او د سیکټوري ریاستونو له غړو سره د افغانستان د مالیاتي نظام او د مالیاتو د تحصیل بهیر په تړاو د دغه ولایت په مقام کي ناسته وکړه او په دغو برخو کي ئې معلومات ورکړل.
په دې ناسته کي د زابل د مرستیال والي، د دفتر رئیس، مستوفي، د صنعت او سوداګرۍ رئیس، د سیکټوري ریاستونو رئیسانو او د مالي چارو کارکوونکو سربېره سوداګرو، صنعتکارانو، ډاکټرانو، تېل پلورونکو، صرافانو او اصنافو ګډون کړی وو.
د زابل مرستیال والي حافظ سیدالرحمن حافظ د هیواد او اسلامي نظام د بقا له پاره د ستونزو را برسېره کول او له مسئولینو سره ئې شریکول اړین وبلل او وئې ویل، چي نن ورځ مو خپلي ستونزي د عوایدو لوی ریاست له استازو سره شریکي کړئ، چي په راتلونکي کي د مالیاتو په راټولولو کي اګاهي ولرو او ستونزي په اسانۍ سره حل کړو.
وروسته بیا په معلوماتي پریزنټېشن کي د کورني صنعت او سوداګرۍ د ملاتړ او پراختیا په موخه د مالیاتي معافیتونو او تخفیفونو، د افغانستان د مالیاتي نظام، د مالیې ډولونو، د مالیې د تحصیل بهیر، د مالیه ورکوونکو د حقوقو او مکلفیتونو سربېره د غیر مالیاتي عوایدو د ترلاسه کولو پر څرنګوالي، په ټایس (TAIS) سیسټم کي د قراردادونو د ثبت پر لارو چار او د (RMIS) سیسټم د کاروني په اړه بشپړ معلومات وړاندي سول او د دواړو لوریو له خوا وړاندیزونه او سپارښتنې سره شریکي سوې.
