د مالياتي محاسبينو خبرتیا

د مالياتي چارو د ادارې قانون د دري دېرشمې (۳۳) مادې له مخه ټول مالیاتي محاسبین چې مالیه ورکوونکيو ته په مالیاتي چارو کې د مالیاتي مشورو، د مالیاتي اسنادو د چمتو کولو، د محاسبې اړوند او نور مالیاتي خدمتونه وړاندې کوي، د مالیې وزارت د عوایدو لوی ریاست سره ثبت او بايد د مالیاتي محاسبینو جواز ولري.

د مالیې وزارت د عوایدو لوی ریاست په پام کې لري چې د مالیاتي محاسبینو د ثبت او هغوی ته د جواز د ورکړې د څلورمې دورې پروسه پیل کړي.

په همدې موخه هغه کسان چې د لاندېنيو شرطونو لرونکي وي، د ۱۴۰۱ لمريز کال د وري مياشتې له پېنځه ويشتمې (۲۵) نېټې څخه د غويي مياشتې تر درويشتمې (۲۳) نېټې پورې د گمرکونو او عوایدو معینیت کې د عوایدو لوی ریاست اړوند د حقوقي خدمتونو ریاست د مالیاتي محاسبینو لوی مدیریت ته دې مراجعه وکړي او غوښتنلیک دې تر لاسه کړي.

د مالیاتي محاسبینو د ثبت شرایط

(۱) د مالیاتي چارو د ادارې قانون د دري دېرشمې (۳۳) مادې پر لومړۍ فقرې سربېره لاندېني شرایط باید د مالیاتي محاسب د ثبت له پاره په پام کې ونیول شي:

 شخص باید په قانوني امورو مکلف وي؛

 په اقتصاد، محاسبې، ACCA، حقوق، اداره او تجارت کې د اسنادو په کتو حد اقل د لېسانس تر کچې د لوړو زده‌کړو درلودونکی وي.

 د دولت رسمي او برحال اداري کارمند نه وي.

 د محکمې له خوا د مجرم په توگه پېژندل شوی نه وي.

 شخص به بل شخصي شرکت نه لري، ځکه د منافعو د تضاد مخنیوی وشي.

(۲) د مالیاتي مشورتي شرکت مسئولین که پر پورتنيو شرطونو برابر وي، د دې طرزالعمل په رڼا کې د جواز مستحق دي او هم نور مالیاتي محاسبین په خپل دفتر کې استخدامولی شي.

د ازموینې پوښتنې

(۱) مالیاتي قوانین، پر عایداتو باندې د مالیاتو لارښودونه، د مالیاتي چارو اداري لارښود او همدارنگه مالیاتي مقررات، طرزالعملونه او عمومي حکمونه

(۲) د محاسبې اساسي اصول

(۳) سوداگریزه محاسبه

(۴) مدیریتي حسابداري

(۵) مالي حسابداري

(۶) د پانگونې او شرکتونو قانون، سوداگریز قوانین او نور مالي قوانین

پر شرایطو برابر کسان له پورتنۍ مرجع څخه د غوښتنلیک فورمه تر لاسه کولی شي او تر ډکولو وروسته د تحصیلي اسنادو او د تذکرې له کاپيو سره دې یو ځای بېرته اړوندې مرجع ته وسپاري او یا يې په برېښنايي ډول لاندېنيو برېښليکونو ته واستوي.

یادونه: که څوک په برېښنايي توگه نوملیکنه کوي، نو د لاندېني لېنک له لارې دې خپله نوملیکنه وکړي.

د غوښتنليک فورمه (پښتو)

د غوښتنليک فورمه (دري)

د لازیاتو معلوماتو له پاره په لاندېنيو شمېرو او برېښليکونو سره اړيکه ټينگولی شئ.

د اړیکو شمېرې: ۰۲۰۲۹۲۴۲۰۰۵ – ۰۲۰۲۹۲۴۹۱۵

برېښليکونه: obaid.arabzai@mof.gov.af / ebad.darman@mof.gov.af