د ملکیتونو سهم کرايې پر مالیاتي باقیاتو د معافیت خبرتیا
د هغو هیوادوالو لپاره یو ښه زېری دئ، چي د ملکیت د سهم کرايې په برخه کي د تېرو کلونو د مالیاتو باقیداري لري؛
د مالیې وزارت په وړاندیز د اسلامي امارت کابينې د (۵/۹/۱۴۴۴) کال د (۲۹مي) شمېرې پرېکړي پر اساس په ټول هيواد کي له تېرو کلونو څخه تر (۱۳۸۹) کال پوري د ملکیتونو سهم کرايې باقي مالیات په هغه صورت کي معاف کړي دي، چي مالیه ورکوونکي د (۱۳۹۰) څخه تر (۱۴۰۱) مالي کلونو د اصلي مالیې باقیداري د (۱۴۰۲) کال د جوزا میاشتي تر وروستیو پوري تحویل کړي.
د یادوني وړ ده، هغه ماليه ورکوونکي، چي د دې طرحي له منظورۍ مخکي ئې د تېرو کلونو ماليات او اضافي ماليات تصفيه کړي وي، په دې پرېکړه کي نه دي شامل.
نو له هغو قدرمنو مالیه ورکوونکو څخه، چي په دغه معافیت کي شامل دي؛ غوښتنه کېږي، چي له دې طلايي چانس څخه ګټه پورته کړي او د خپلو تېرو کلونو باقیداریاني ژر تر ژره تحویل کړي، ځکه چي د دې معافیت د اعتبار موده، د غځېدو وړ نه ده.
