د افغانستان لاس بې اسنادو (یو کیلي) موټرونو د ثبت او محصول پروسه د روان کال تر پایه تمدید سوه

د مالیې وزارت د ګمرکونو لوی ریاست په وړاندیز او د ا.ا.ا د کابینې په تائید د افغانستان لاس د بې اسنادو (یوکیلي) موټرونو د ثبت او محصول پروسه د شته کړنلاري له مخي د (۱۴۰۲) هـ.ل کال تر پایه تمدید سوه.
یاده پروسه د ۱۴۰۲ کال- حمل له ۱۷مې نېټې څخه د هیواد په اووه زونونو (کابل, هرات، بلخ، ننګرهار، کندهار، کندز او خوست/پکتیا) کي پيلېږي.
د یو کیلي موټرونو د ثبت او محصول په شته کړنلاره کي د خلکو اقتصادي حالات په پام کي نیول سوي او په داسي لارو چارو فکر سوی، چي د بې اسناده موټرونو مالکین وکولای سي، خپلو موټرونو ته اسناد واخلي. د بې اسناده موټرونو په محصول کي په لویه سلنه تخفیف ورکړل سوی، چي په لاندې ډول دی:
له (۱۹۹۰) څخه تر (۲۰۰۰) ماډل موټرونو ته (۶۰ سلنه) تخفیف ورکړل سوی.
له (۲۰۰۱) څخه تر (۲۰۰۹) ماډل موټرونو ته (۵۰ سلنه) تخفیف ورکړل سوی.
د (۲۰۱۰) څخه تر (۲۰۱۲) ماډل موټرونو ته (۲۵ سلنه) تخفیف ورکړل سوی.
همداشان د هیواد په ټولو ولایتونو کي د بې اسنادو موټرونو له ګرځېدو څخه د مخنیوي او ګمرک ته د یادو موټرونو د تسلیمېدو په موخه د اړوندو ادارو څخه یو کمېسیون جوړ سوی، چي د یادي پروسې له پیل سره به چا ته اجازه ور نه کړي، چي بې اسناده موټر وګرځوي او مکلف دي چي قانوني سندونه ورته واخلي.