له هیواد څخه د غنمو د صادراتو په هکله د مالیې وزارت د ګمرکونو عمومي ریاست خبرتیا!
په دې وروستیو کي ځیني ناسم خبرونه خپاره سوي، چي ګواکي له هیواد څخه غنم په قاچاقي ډول بهر ته صادریږي. مالیې وزارت دغه اوازي ناسمي بولي او په کلکو ټکو یې ردوي. د مالیې وزارت د ګمرکونو عمومي ریاست یو ځل بیا په پوره ډاډ سره یادونه کوي، چي د هیواد د ټولو ګمرکونو له لاري بهر ته په قاچاقي او غیر قانوني ډول د غنمو صادرول په کلکه منعه دي او دغه چاره جرم ګڼي. د مالیې وزارت د هدایت په اساس په ټولو ګمرکونو کي د قاچاقي توکو د مخنیوي کلک تدابیر نیول سوي دي او هیڅ چاته اجازه نه ورکول کیږي؛ تر څو په قاچاقي او غیر قانوني ډول غنم له هیواد څخه بهر صادر کړي. که چيري کوم څوک په ګمرکونو کي، بهر ته د غنمو د قاچاق په تړاو کره اسناد او یا د کوم قاچاقي بانډ په تړاو معلومات ولري؛ نو کولای سي د لاندي برېښنالیک او یا ټليفون شمېرې باندي اړیکه ونیسي، تر څو د ورته غیري قانوني کړنو مخه په بشپړ ډول ونیول سي. ټلیفون شماره: ۲۲۱ ایمېل ادرس: Callcenter.customs@mof.gov.af د مالیې وزارت د ګمرکونو او بندرونو ویښ او زړور منسوبین شپه او ورځ د هیواد په ټولو ګمرکونو کي په دقیق ډول د ټولو ممنوعه توکو په صادرولو او واردولو باندي کلکه څارنه لري او هيڅ چاته اجازه نه ورکوي، تر څو په غیر قانوني ډول ممنوعه توکي وارد او یا له هیواد څخه بهر کړي.
